დავით ბეჟიტაშვილი

четверг, 24 июля 2014 г.

„ჯიმი ჯიმი, აჯა აჯა“… ჯიმი საქართველოშია. ინდოეთის არაოფიციალური ელჩი საქართველოში დათო ბეჟიტაშვილი

მან ინდოეთი საქართველოში ჩამოიტანა. ინდოეთში კი საქართველო ჩაიტანა. ინდური ფილმების მოყვარულიდან – ბოლივუდში აქტიურ საქმიანობამდე დიდი დრო და ენერგია დახარჯა, თუმცა ყველაფერი – საკუთარი სიამოვნებისთვის. ეს ინდური კულტურის არაოფიციალური ელჩი საქართველოში – დავით ბეჟიტაშვილია. ფერადი ქვეყნის საინტერესო მომენტებზე, ბოლივუდის ვარსკვლავურ ცხოვრებასა და სანელებლებით გაჯერებულ ქვეყანაზე დავით ბეჟიტაშვილი გვესაუბრა.

- დათო, როგორ დაიწყო სიყვარული ინდოეთისადმი?
- ინდური ფილმების სიყვარულს ბებიამ მაზიარა. მას დავყავდი კინოში და ეს სიყვარული იმდენად დიდი იყო, რომ 12 წლის ვიყავი, ჩემს უბანში, კინოთეატრ ბათუმის საპროექციოში მივედი და ვთხოვე, ესწავლებინათ კინოს გაშვება. ასე მოვხვდი კინოთეატრში. იმ პერიოდში მაქსიმალურად ვისრუტავდი ინფორმაციას ინდურ ფილმზე. მაშინ ვერც კი წარმოვიდგენდი, რომ იმ ვარსკვლავებს შევხვდებოდი, რომლებსაც საპროექციოდან ვუყურებდი, მაგალითად ამიტაბჰ ბაჩანს, რომელიც ინდოეთში ღმერთთან გათანაბრებული ფიგურაა, აიშვარია რაის, მითჰუნ ჩაკრაბორტს და სხვა უამრავ მსახიობს. კინოთეატრში მუშაობის შემდეგ, ჩემი საქმიანობა ტელევიზიაში გავაგრძელე. ვარკეთილის ტელევიზიაში, „ევრიკაზე“ და „კავკასიაზე“ ინდური ფილმების რეტროსპექტივა მიმყავდა. ინდური ფილმები ისე უყვარდა მოსახლეობას, რომ ამ გადაცემებმა ძალიან პოპულარული გამხადა.

- თუ გახსოვს პირველი შეხვედრა ინდოეთთან და რით დაგამახსოვრა თავი ფერადმა ქვეყანამ?
- როცა შენი საქმე გიყვარს. როცა გულით მოინდომებ, ყველაფერი გამოგივა, ამას მივხვდი ჩემს საკუთარ მაგალითზე. 2006 წელს მოვხვდი ინდოეთში და აქედან დაიწყო ჩემი ურთიერთობა ბოლივუდთან, ვარსკვლავების გაცნობა.. მქონდა ოცნება, რომ ქართული კინო გადამეღო ინდოეთში და ინდური-საქართველოში. 2009 წელს გადავიღეთ „ყველაფერი კარგად იქნება“. ახლა კი მეორე ოცნებაც ამიხდა. ბედნიერი ვარ, რომ უკვე ერთი თვეა საქართველოში ინდური ფილმის გადაღება მიმდინარეობს.
- რა ჰქვია ფილმს და როდის იხილავს მაყურებელი მას?
- „უბრალოდ სიყვარული“, – ასე ჰქვია ფილმს, რომლის გადაღება საქართველოს სხვადასხვა ქალაქში ახალგაზრდა ნიჭიერი პროდიუსერის ირაკლი მაქაცარიას თაოსნობით მიმდინარეობს. სრულმეტრაჟიანი კინოსურათის გადასაღებად ინდოეთიდან 50 ადამიანია ჩამოსული, მათ შორის ბოლივუდის ვარსკვლავი მითჰუნ ჩაკრაბორტი, რომელსაც ქართველი მაყურებელი კარგად იცნობს. ფილმის პრემიერა წლის ბოლოს გაიმართება. პირველად ფილმს ქართველი მაყურებელი იხილავს.

- დათო, რამ მიგიზიდათ ინდურ კულტურაში. რა არის ის მუხტი, რომელიც ამდენი წელია ინდურ სამყაროში გამყოფებს?
- ინდოეთში თავს სულიერად დამშვიდებულად ვგრძნობ. ეს ქვეყანა ძალიან ჩემია. ბომბეიში, სადაც არნახული სიღატაკე და შიმშილია, ადამიანები იღიმიან, თავს ბედნიერად გრძნობენ. იქ არ აინტერესებთ პოლიტიკა, ყველა გართობასა და მხიარულებაზე ფიქრობს. ერთხელ რომ ჩახვალ, ეს ქვეყანა ისე გიზიდავს, სამშობლოში ჩამოსული სულ უკან დაბრუნებაზე ფიქრობ.
- ინდოეთში რომ დაბადებულიყო, ვინ იქნებოდა დავით ბეჟიტაშვილი?
- ინდოეთში რომ დავბადებულიყავი, დარწმუნებული ვარ მაინც კინოში ვიქნებოდი.
- როგორია შენი ინდოეთი?
- ჩემი ინდოეთი არის ფერადი, ლამაზი, მუსიკალური. ეს იმხელა სიყვარულია, მეც მოვიწამლე და ვცდილობ, სხვაც მოვწამლო. ვფიქრობ, ბებია ბედნიერი იქნებოდა, რომ გაეგო, მე ცოტა ხნის წინ ამიტაბჰ ბაჩანს რომ შევხვდი და მასზე ვესაუბრე.

ნანუკა ალავიძე

суббота, 5 апреля 2014 г.

ინდური კინოს ფესტივალი თბილისში

21-24 მარტს, კინოთეატრ "რუსთაველში" ბოლივუდის 100 წლისთავისადმი მიძღვნილი ინდური ფილმების ფესტივალი გაიმართა.

ღონისძიება ინდოეთის საელჩოს, კულტურისა და ძეგლთა დაცვის სამინისტროს და საქართველო–ინდოეთის კულტურულ ურთიერთობათა ასოციაციის მხარდაჭერით გაიმართა.
ფესტივალის ფარგლებში ნაჩვენები იყო უკანასკნელი წლების საუკეთესო ინდური ფილმები.
ფესტივალი საზეიმოდ გაიხსნა 21 მარტს და მას ინდოეთის ელჩი საქართველოში სურეშ ბაბუ, საქართველოს კულტურისა და ძეგლთა დაცვის მინისტრის მოადგილე ალექსანდრე მარგიშვილი, საგარეო საქმეთა მინისტრის მოადგილე დავით ჯალაღანია და საქართველო-ინდოეთის კულტურული ურთიერთობის ასოციაციის წარმომადგენლები დაესწრო.

ინდური ფილმების დიდ ეკრანზე ნახვას მონატრებულ მაყურებელთა შორის დარბაზში საქართველოში მყოფი ინდოელი ბიზნესმენები და საზოგადოების ცნობილი სახეებიც იყვნენ.
ფესტივალის გახსნაზე მაყურებლისთვის განსაკუთრებული სიურპრიზები მომზადდა. ნაჩვენები იქნა 60 წლის წინ გადაღებული დოკუმენტური ფილმი, რომელიც ინდური კინოს ლეგენდების რაჯ კაპურის და ნარგისის საქართველოში სტუმრობას ასახავს. ასევე ინდური კინოს ქართველი თაყვანისმცემლებისათვის ცნობილი ვარსკვლავის მითჰუნ ჩაკრაბორტის მიერ სპეციალურად მომზადებული და გამოგზავნილი მასალაც აჩვენეს.
ფესტივალის ორგანიზატორებმა ღონისძიების დაწყებამდე ინდური ტრადიციის თანახმად, როგორც ახალი კეთილი საქმის საფუძვლის ჩაყრისას ხდება ხოლმე, ლამპარი აანთეს.

ფესტივალის ორგანიზატორების სიტყვით გამოსვლის შემდეგ მაყურებელმა 2013 წლის ერთ-ერთი ყველაზე შემოსავლიანი ფილმი „ბაიკერები 3“ ნახა. ფესტივალის ფარგლებში ნაჩვენებ ფილმებზე დასწრება მსურველთათვის თავისუფალი იყო.

среда, 15 января 2014 г.

გადაცემა "სხვა შუადღე" - სტუმარი: დავით ბეჟიტაშვილი

вторник, 19 ноября 2013 г.

მითჰუნ ჩაკრაბორტის თბილისური ვიზიტი

წარსდგენა არ სჭირდება მაგრამ მაინც წარვადგენ: ნამდვილი სახელი გაურანგა ჩაკრაბორტი, კინემატოგრაფში მითჰუნ ჩაკრაბორტად ცნობილი, ჩვენი ინდური კინოს მოყვარულთათვის (და არა მხოლოდ მოყვარულთათვის) - ჯიმიდ ცნობილი ინდოელი მსახიობი, 1950 წლის 16 ივნისს დაიბადა კალკუტაში, ღარიბ ოჯახში.
კინოზე მეოცნებე ახალგაზრდა თავისი გარეგნობისა და პლასტიკის წყალობით მიუხედავად ბევრი დაბრკოლებისა პუნის კინოინსტიტუტის სამსახიობო ფაკულტეტზე ჩაირიცხა, რომელიც შემდგომ ოქროს მედალზე დაამთავრა. კინოში მისი დებიუტი ჯერ კიდევ ინსტიტუტში სწავლის პერიოდში შედგა ფილმში "Do Anjaane".

1976 წელს კი ის პირველ პრემიას "ოქროს ლოტოს"-ს იღებს ფილმისათვის "Mrigayaa".
250-ზე მეტ ფილმში შესრულებული მთავარი როლიდან ფილმი რომელმაც ჩაკრაბორტი ფაქტიუტად მეგავარსკვლავად აქცია როგორც ინდოეთში ასევე მის გარეთ, 1982 წელს გამოვიდა ეკრანებზე სახელწოდებით "Disco Dancer". დღესდღეობით ყველამ, მიუხედავად იმისა არის თუ არა დაინტერესებული ინდური კინემატოგრაფით - მითჰუნ ჩაკრობორტი სწორედ ამ ფილმით იცის და ამ ფილმით შეიყვარა.
შორიდან დავიწყე, თუმცა სტატიის მკითხველებისათვის ერთი ბედნიერი დღის შეხსენება მინდა. 25 ოქტომბერს მსახიობის ქართველ ფანებს ოცნება აუსრულდათ. თბილისში პირადი საქმეების გამო ჩამოსულ მსახიობთან მაყურებლის შეხვედრა მოხერდხა. P.S. -ს ჯგუფმა და ინდური კინოს მცოდნემ, პროდიუსერმა დათო ბეჟიტაშვილმა მჭიდრო გრაფიკიდან ერთი საათი გამოსტაცეს მსახიობს და ისიც ათონელის თეატრში, თაყვანისმცემლებით სავსე დარბაზში ასობით ბედნიერი ადამიანის წინაშე აღმოჩნდა. როგორც ჩანს ეს მისთვის სასიამოვნო სიურპრიზი იყო.
-ვერასოდეს წარმოვიდგენდი, რომ როდესმე წავიყვანდი საღამოს რომლის სტუმარიც თავად მითჰუნ ჩაკრაბორტი იქნებოდა - აღნიშნა საღამოს ორგანიზატორმა და წამყვანმა დათო ბეჟიტაშვილმა და მისი მისალმების შემდეგ სცენა ინდური ცეკვის ანსამბლ ლაკშმის დაუთმო.
მეგავარსკვლავის პირისპირ აღმოჩენილი ქართველი მოცეკვავეები თავიდან ცოტა არ იყოს დაიბნენ. მათ კარგად იცოდნენ რომ მათ წინაშე არა მხოლოდ მათი საყვარელი ეკრანული გმირი, არამედ ცნობილი რეალითი შოუს "Dance India Dance" -ს ჟიურის მთავარი წევრი იჯდა. მღელვარებამ მალევე გაიარა. მის განმუხტვაში ქართველ მოცეკვავეებს თავად მსახიობის კეთილი ღიმილი და ცეკვის რითმებს აყოლებული მსახიობის თითები დაეხმარა.
უფროს მოცეკვავეებს ანსამბლის პატარა მონაწილე ჩაენაცვლა, რომელიც ცეკვის დასრულებისას მსახიობმა თავისთან იხმო და გულში თბილად ჩაიკრა. სტუმარს კიდევ ერთი ფანი, მსახიობი დათო როსტომაშვილიც მიესალმა. მან ჩვეული ხუმრობით მოუთხრო მსახიობს მისი ფილმების შესახებ გავრცელებული ანეგდოტები და მისი ყველაზე პოპულარული ფილმიდან სიმღერაც წაიმღერა.
- მიხარია რომ აქ მოვხვდი და ალბათ ასეც უნდა მომხდარიყო, მე უნდა ჩამოვსულიყავი საქართველოში - მოგვიანებით აღნიშნა მსახიობმა და დარბაზში მსხდომ ადამიანებს, განსაკუთრებით კი მის დიდ თაყვანისმცემელს ქ-ნ იზა გველესიანს მადლობა გადაუხადა. მან ასევე აღნიშნა რომ უამრავ სიურპრიზთან ერთად ეს საღამოც მისთვის დიდი სიურპრიზი იყო.
სიტყვის დასრულების შემდეგ დათო ბეჟიტაშვილმა მას კიდევ ერთ სიურპრიზს დაპირდა და სცენაზე დარჩენა სთხოვა.
არვიცი თავად მსახიობისათვის რამდენად სიურპრიზი იყო მისი ყველაზე ცნობილი ფილმების კლიპებიდან გაკეთებული პოპური, რომლითაც ანსამბლ ლაკშმის სოლისტმა შეეცადა მსახიობის წინაშე ეკრანულ გმირები გაეცოცხლებინა, მაგრამ დარბაზისათვის ნამდვილად დიდი მოულოდნელობა იყო მათ წინაშე აცეკვებული მსახიობი. ახლა მათ წინაშე გაცოცხლებული ეკრანული გმირი იდგა და ფეხზე მდგომი მაყურებელი დიდხანს უკრავდა ტაშს მოულოდნელ სანახაობას.
საღამო ცხადია მაყურებელთან პირისპირ შეხვედრით, სამახსოვრო ფოტოების გადაღებითა და ავტოგრაფების დარიგებით დასრულდა.
ცხადია ყველა ინდური კინოს მოყვარულს, ვისაც შესაძლებლობა მიეცა დასწრებოდა ამ საღამოს, მთელი ცხოვრების მანძილზე გაჰყვება სასიამოვნო მოგონებად საყვარელ მსახიობთან შეხვედრა.
საკუთარი და მათი სახელით კიდევ ერთხელ დიდ მადლობას ვუხდი დათო ბეჟიტაშვილს ამ საღამოს ორგანიზებისათვის.

P.S.-ს სიუჟეტი მსახიობის ვიზიტთან დაკავშირებით

среда, 22 мая 2013 г.

"7 წლის ვიყავი, როდესაც ბებიამ პირველად წამიყვანა კინოში და ჩემი პირველი ინდური ფილმი გახლდათ "დაგვიანებული შურისძიება" ამიტაბჰ ბაჩანის მონაწილეობით.
ამ ფილმმა, ჩემზე წარუშლელი შთაბეჭდილება დატოვადა იმ დღიდან დაიწყო ჩემი სიყვარული ინდური კინემატოგრაფიის მიმართ"... - არაერთ ინტერვიუში აღნიშნავს დათო ბეჟიტაშვილი...

2013 წლის 24 აპრილს დათოს ბებია გარდაეცვალა...

ვიზიარებთ მის მწუხარებას...

უფალმა დაუმკვიდროს სასუფეველი...